ფინეთის რესპუბლიკა

ურთიერთობები საქართველოსა და ფინეთის რესპუბლიკას შორის

დიპლომატიური ურთიერთობები საქართველოსა და ფინეთის რესპუბლიკას შორის დამყარდა 1992 წლის 8 ივლისს.

2022 წელს აღინიშნა დიპლომატიური ურთიერთობების დამყარების 30 წლის იუბილე. 

ფინეთის რესპუბლიკაში საქართველოს დიპლომატიური წარმომადგენლობა ფუნქციონირებს 2011 წლიდან, ხოლო ფინეთი საქართველოს დიპლომატიურ გადაფარვას ახორციელებს ჰელსინკიდან - არარეზიდენტი ელჩის მეშვეობით (აკრედიტებულია ასევე აზერბაიჯანსა და სომხეთში).

თანამშრომლობის ძირითადი სფეროები

საქართველოსა და ფინეთის რესპუბლიკას მჭიდრო, მეგობრული ურთიერთობები აკავშირებთ, რომელიც ეფუძნება დამოუკიდებლობისა და არჩევანის თავისუფლებისთვის ბრძოლის საერთო წარსულსა და ერთგულებას ერთიანი ევროპული ღირებულებებისადმი.

ქართულ-ფინური თანამშრომლობა მოიცავს ძირითადად პოლიტიკურ, საპარლამენტთაშორისო, ეკონომიკურ, თავდაცვისა დ განათლების სფეროებს.

ორ ქვეყანას შორის ხორციელდება მაღალი დონის ვიზიტები, რეგულარულ ხასიათს ატარებს პოლიტიკური დიალოგი როგორც აღმასრულებელ, ისე საკანონმდებლო დონეზე. აღსანიშნავია ფინეთის რესპუბლიკის პრეზიდენტის, საული ნიინისტოს, ვიზიტი თბილისში საქართველოს I დემოკრატიული რესპუბლიკის (1918-1921 წ.წ.) დაარსებიდან 100 წლის იუბილესთან დაკავშირებით. მნიშვნელოვანი იყო ასევე საქართველოს საგარეო საქმეთა მინისტრის ორმხრივი ვიზიტი ფინეთში, რომელიც შედგა 2018 წლის ნოემბერში, ნორდიული ტურნეს ფარგლებში.

ფინეთი მტკიცედ უჭერს მხარს საქართველოს ტერიტორიულ მთლიანობასა და ოკუპირებული ტერიტორიების არაღიარების პოლიტიკას. საქართველო ღრმად აფასებს ფინური მხარის ფართო მონაწილეობას საქართველოში ევროკავშირის სადამკვირვებლო მისიაში (EUMM).

ფინეთის რესპუბლიკა მხარს უჭერს ქართველი ხალხის ისტორიულ არჩევანს გახდეს ჩვენი ქვეყანა ევროკავშირისა და ნატო-ს სტრუქტურების სრულუფლებიანი წევრი. ხაზგასასმელია ფინურ მხარესთან წარმატებული თანამშრომლობა ევროკავშირის Twining პროექტების ფარგლებში სხვადასხვა დარგობრივი მიმართულებით.

ქვეყნებს შორის თანამშრომლობა ინტენსიურია საკანონმდებლო დონეზე. ორივე ქვეყნის პარლამენტში მოქმედებს მეგობრობის ჯგუფები. აღსანიშნავია საქართველოს პარლამენტის თავმჯდომარის, შალვა პაპუაშვილის, ოფიციალური ვიზიტი ფინეთის რესპუბლიკაში 2022 წლის ივნისში.

მზარდი დინამიკით ხასიათდება ორმხრივი ურთიერთობები ვაჭრობის, ეკონომიკის, ტურიზმის სფეროში. საქართველო რეგულარულად მონაწილეობს ნორდიულ ქვეყნებში უმსხვილეს საერთაშორისო ტურისტულ გამოფენა-ბაზრობაში „MATKA“. გავლენიანმა ტურისტულმა ჟურნალმა „MONDO“, საქართველო 2018 წლის საუკეთესო ტურისტულ ხუთეულში შეიყვანა. 2020 წლის იანვარში კი საქართველო „წლის ტურისტულ მიმართულებად დასახელდა“. 

ქართულ-ფინური ბიზნეს კავშირების გაღრმავების მიზნით, მნიშვნელოვანი იყო 2022 წლის ოქტომბერში, თბილისში, ჩატარებული საქართველო-ფინეთის ბიზნესფორუმი.

სავაჭრო-ეკონომიკური ურთიერთობების განვითარების კუთხით ასევე აღსანიშნავია საქართველოს სავაჭრო-სამრეწველო პალატასა და ფინეთის სააგენტოს „Finpro“ (ფინური კომპანიების საერთაშორისო ბაზარზე ოპერირების ხელშემწყობი სააგენტო) შორის 2015 წელს გაფორმებული ურთიერთგაგების მემორანდუმი.

აქტიურად მიმდინარეობს ქვეყნებს შორის თანამშრომლობა თავდაცვის სფეროში ძირითადად კიბერუსაფრთხოების, რეზერვისა და მობილიზაციის მიმართულებებით.

2019 წელს საქართველოსა და ფინეთის განათლების სამინისტროებს შორის ხელი მოწერა ხელშეკრულებას ზოგადი განათლების სფეროში თანამშრომლობის შესახებ.

2018 წელს, ქართული ჯგუფის „ალიანსი“ დაფინანსებით და ფინეთის განათლების კონსორციუმის ხელშეწყობით, საგურამოში გაიხსნა ფინური საერთაშორისო სკოლა, რომელიც არის პირველი და ერთადერთი საგანმანათლებლო დაწესებულება სრულიად კავკასიის რეგიონში, სადაც დანერგილია ფინური განათლების მოდელი.

ამასთან, აღსანიშნავია ის მნიშვნელოვანი პროექტები, რომელიც განხორციელდა, ფინეთის მთავრობის მხარდაჭერით და გაერო-ს განვითარების ოფისთან (UNDP) თანამშრომლობით, 2008 წლის აგვისტოს ომის შედეგად განადაგურებული ბორჯომი-ხარაგაულის სატყეო ეკოსისტემების აღდგენისა და წყლის მონიტორინგის სისტემის გაუმჯობესების მიზნით.

 

ბმულები:

ფინეთის რესპუბლიკის საგარეო საქმეთა სამინისტრო
ფინეთის რესპუბლიკის მთავრობა
ფინეთის რესპუბლიკის ედუსკუნტა (პარლამენტი)