ფინეთის რესპუბლიკა

დიპლომატიური ურთიერთობების ქრონოლოგია

დიპლომატიური ურთიერთობები საქართველოსა და ფინეთის რესპუბლიკას შორის დამყარდა 1992 წლის 8 ივლისს.
2022 წელს აღინიშნა დიპლომატიური ურთიერთობების დამყარების 30 წლის იუბილე. 
ფინეთის რესპუბლიკაში საქართველოს დიპლომატიური წარმომადგენლობა ფუნქციონირებს 2011 წლიდან, ხოლო ფინეთი საქართველოს დიპლომატიურ გადაფარვას ახორციელებს ჰელსინკიდან - არარეზიდენტი ელჩის მეშვეობით [აკრედიტებულია ასევე აზერბაიჯანსა და სომხეთში].

თანამშრომლობის ძირითადი სფეროები

საქართველოსა და ფინეთის რესპუბლიკას მჭიდრო, მეგობრული ურთიერთობები აკავშირებთ, რომელიც ეფუძნება ურთიერთნდობასა და საერთო ევროპულ და ევროატლანტიკურ ღირებულებებსა და ინტერესებს. 
ქართულ-ფინური თანამშრომლობა მოიცავს ძირითადად პოლიტიკურ, საპარლამენტთაშორისო, ეკონომიკურ, თავდაცვისა და განათლების სფეროებს.
ორ ქვეყანას შორის რეგულარულ ხასიათს ატარებს პოლიტიკური დიალოგი. ხორციელდება ვიზიტები  როგორც აღმასრულებელ, ისე საკანონმდებლო დონეზე. აღსანიშნავია ფინეთის რესპუბლიკის პრეზიდენტის ვიზიტი თბილისში საქართველოს I დემოკრატიული რესპუბლიკის დაარსებიდან 100 წლის იუბილესთან დაკავშირებით. ფინეთის საგარეო საქმეთა მინისტრი არა ერთხელ ეწვია საქართველოს 2008-2010 წლებში. მნიშვნელოვანი იყო აგრეთვე საქართველოს საგარეო საქმეთა მინისტრის ორმხრივი ვიზიტები ფინეთში, რომელიც შედგა 2018  და 2024 წლებში.
საქართველო დიდ მნიშვნელობას ანიჭებს ფინეთთან პოლიტიკური დიალოგის  განვითარებას ასევე სხვადასხვა ნორდიულ რეგიონული ფორმატის ფარგლებში, საერთო ინტერესის მქონე სტრატეგიულ საკითხებზე. 
ფინეთის რესპუბლიკა მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას, ოკუპირებული ტერიტორიების არაღიარების პოლიტიკას. ფინეთი, როგორც ეუთო-ს თავმჯდომარე ქვეყანა, ჩართული იყო სამშვიდობო მედიაციის პროცესში 2008 წლის რუსეთ-საქართველოს აგვისტოს ომის დროს. საქართველო განსაკუთრებულად აფასებს ფინური მხარის ჩართულობას საქართველოში მოქმედ ევროკავშირის სადამკვირვებლო მისიაში [EUMM].
ფინეთის რესპუბლიკა მხარს უჭერს ქართველი ხალხის თავისუფალ არჩევანს, გახდეს საქართველო ევროკავშირისა და ნატო-ს სრულუფლებიანი წევრი. ხაზგასასმელია ფინურ მხარესთან წარმატებული თანამშრომლობა ევროკავშირის Twinning-ის პროექტების ფარგლებში სხვადასხვა დარგობრივი მიმართულებით.
ქვეყნებს შორის მჭიდროა თანამშრომლობა საკანონმდებლო დონეზე. ინტენსიურად ხორციელდება საპარლამენტო დელეგაციების ვიზიტების ურთიერთგაცვლა. ორივე ქვეყნის პარლამენტში მოქმედებს მეგობრობის ჯგუფები. აღსანიშნავია საქართველოს პარლამენტის თავმჯდომარის ოფიციალური ვიზიტი ფინეთის რესპუბლიკაში 2022 წელს.
მზარდი დინამიკით ხასიათდება ორმხრივი ურთიერთობები ვაჭრობის, ეკონომიკისა და ტურიზმის სფეროში. საქართველო რეგულარულად იღებს მონაწილეობას ნორდიულ ქვეყნებში უმსხვილეს საერთაშორისო ტურისტულ გამოფენა-ბაზრობაში „MATKA“. აღნიშნულის ფარგლებში, 2020 წელს, საქართველო „წლის ტურისტული მიმართულების“ ქვეყნად დასახელდა. 
ქართულ-ფინური ბიზნეს კავშირების გაღრმავების მიზნით, მნიშვნელოვანი იყო 2022 წელს, თბილისში, ჩატარებული საქართველო-ფინეთის ბიზნეს-ფორუმი.
აქტიურად მიმდინარეობს ქვეყნებს შორის თანამშრომლობა თავდაცვის სფეროში ძირითადად კიბერუსაფრთხოების, რეზერვისა და მობილიზაციის მიმართულებებით.
2019 წელს საქართველოსა და ფინეთის განათლების სამინისტროებს შორის ხელი მოეწერა ხელშეკრულებას ზოგადი განათლების სფეროში თანამშრომლობის შესახებ.
2019 წელს, ქართული ჯგუფის „ალიანსი“ დაფინანსებით და ფინეთის განათლების კონსორციუმის ხელშეწყობით, საგურამოში გაიხსნა ფინური საერთაშორისო სკოლა, რომელიც არის პირველი და ერთადერთი საგანმანათლებლო დაწესებულება სრულიად კავკასიის რეგიონში, სადაც დანერგილია ფინური განათლების მოდელი.
აღსანიშნავია აგრეთვე ის მნიშვნელოვანი პროექტები, რომელიც განხორციელდა, ფინეთის მთავრობის მხარდაჭერით და გაერო-ს განვითარების ოფისთან [UNDP] თანამშრომლობით, 2008 წლის აგვისტოს ომის შედეგად განადგურებული ბორჯომი-ხარაგაულის სატყეო ეკოსისტემების აღდგენისა და წყლის მონიტორინგის სისტემის გაუმჯობესების მიზნით.
საქართველოსა და ფინეთს შორის გაფორმებული სამართლებრივი შეთანხმებები მოიცავს  ეკონომიკის, გარემოს დაცვისა და სხვა სფეროებს.

ბმულები

ფინეთის რესპუბლიკის საგარეო საქმეთა სამინისტრო
ფინეთის რესპუბლიკის მთავრობა
ფინეთის რესპუბლიკის პარლამენტი [ედუსკუნტა]
ფინეთის რესპუბლიკის პრეზიდენტი